NADIR HAROUB YANGA TULIENI

NADIR HAROUB NAHODHA YANGA SC AUNGURUMA
Nahodha wa Yanga SC Nadir Haroub " Canavaro " amewasihi mashabiki na wapenzi wa timu hiyo kutulia na kuondoa wasiwasi kwa mabadiliko yoyote yanayofanyika katika klabu hiyo hususani benchi la ufundi.
Nadir anatanabaisha kwamba wao kama wachezaji wamejipanga kufanya kazi na mwalimu yoyote yule ambaye uongozi utamleta .

" tumesikia kujiuzulu kwa mwalimu Hans Van Pluijm . Inaumiza kumkosa mtu ambaye umemzoea lakini hii haiwezi kutuathiri lolote maana kama mchezaji lazima ujipange kupokea mbinu na ufundi toka kwa waalimu tofauti tofauti . Tumejiandaa vyema kisaikolojia kupokea mabadiliko yoyote yale pasipo kuathiri mwenendo wa timu katika ligi. Tunatambua thamani ya ubingwa tunao utetea kwa wanajangwani hivyo ni lazima tujipange vyema kuulinda ."
Nahodha huyo ambae amedumu Yanga kwa miaka 10 sasa anakwenda mbali zaidi kwa kuomba umoja na mshikamano kwa wanachama , mashabiki na viongozi ili kufanikisha malengo ya timu.
" wanachama , viongozi na mashabiki wasikubali mabadiliko haya yawagawe na kuipasua timu . Umoja na ushirikiano wao ni chachu yetu ya ushindi kwenye ligi na michuano iliyo mbele yetu. Lazima mwisho wa siku sote tuweke mbele masilahi ya timu"
Nadir aliyepokea kijiti kwa Shadrack Nsajigwa anasifika kwa kuhamasisha umoja , ushirikiano na upendo ndani ya timu pia akiwaongoza wenzake vyema uwanjani kinidhamu .
Hans Van Pluijm aliwahi kusema nyakati fulani ;
" Nadir sio kiongozi tu kwa wenzake bali ni mfano wa kuigwa kwa wenzake kinidhamu na ustahimilivu pale timu inapopitia kipindi kigumu pia uzalendo halisi kwa mapenzi ya kazi yake na timu"