Mshambuliaji wa zamani wa Yanga na Simba, Emmanuel Okwi ametambulishwa rasmi katika klabu ya SC Villa ya nchini Uganda inayoshiriki Ligi Kuu nchini humo.
Okwi na wenzake waliosajiliwa wakati wa dirisha dogo akiwemo na kocha mkuu mpya, Waswa Bbosa walitambulishwa na Rais wa SC Villa, Emmanel Misagga.
Rais Misagga alielezea matarajio makubwa waliyonayo kwa Okwi ambaye hii ni mara ya pili kurudi SC Villa ambayo ndio klabu ilimuuza kwa Simba mwaka 2010 baada ya kufanya vizuri katika msimu wake wa kwanza. Okwi na wenzake wana jukumu zito la kuipa Villa ubingwa wa kwanza wa Ligi Kuu tangu mwaka 2004.
” Tumemsajili Okwi kwa sababu tunataka mabao. Tunahitaji mabao kutoka kwako ( Okwi) na tunatarajia bao moja kwa kila mchezo. ” Amenukuliwa Misagga na mtandao wa Kawowo.
Villa wamemkabidhi Okwi jezi namba 7 ambayo huwa anaivaa katika mechi za timu ya taifa ya Uganda, Uganda Cranes. Amesajiliwa kwa mkataba wa muda mfupi unaokama mwisho wa msimu huu.
Villa ndio klabu maarufu na yenye mafanikio zaidi nchini Uganda licha ya ukame wa miaka 13 bila taji la Ligi Kuu nchini humo.
0 comments:
Post a Comment